O proxecto
O Seminario Permanente sobre Comunicación, Cidadanía e Xornalismo Social é unha iniciativa do Observatorio dos Medios, estabelecido no marco do Colexio Profesional de Xornalistas de Galicia, que procura profundizar na análise, formación e debate das ligazóns existentes entre o tecido organizativo da sociedade civil, os profesionais da comunicación e a comunidade universitaria.
Desde esta premisa, desenvolveranse unha serie de actuacións buscando unha maior e máis efectiva presenza das problemáticas e dos actores sociais nos medios de comunicación, en condicións de igualdade de importancia en relación a outras temáticas e protagonistas cotidianos.
Abordaranse, entre outras, as seguintes áreas:
- Muller, xénero e sexismo.
- Infancia, adolescencia e mocidade.
- Necesidades especiais e discapacidades.
- Persoas maiores.
- Drogodependencias.
- Grupos minoritarios e minorizados.
- Pobreza e Cuarto Mundo.
- Exclusión e integración social.
- Participación democrática e cidadanía.
- Desenvolvemento sustentable.
- Responsabilidade social corporativa.
- Cooperación e acción humanitaria.
Obxectivos
- Reflexionar sobre a función social dos medios na sociedade actual, afrontando o fenómeno da comunicación de masas en relación co mundo dos coñecementos especializados e cos procesos de fragmentación e segmentación social.
- Analizar e valorar a participación dos medios de comunicación na construción da cidadanía e das identidades sociais, así como o potencial rehabilitador que para os propios medios (escritos, audiovisuais e electrónicos) comporta a entrada das organizacións da sociedade civil nas axendas xornalísticas.
- Abordar sistematicamente os novos actores sociais –o Terceiro Sector– na súa interacción cos medios e cos xornalistas, estabelecendo pautas teóricas e procedimentais que visualicen e plasmen na práctica a transversalidade do xornalismo social.
- Desenvolver metodolóxica e tecnicamente a optimización do proceso de comunicación, non só entre as organizacións e os propios medios, senón tamén entre elas mesmas e os demais actores sociais.
- Deseñar unha estratexia orientada á concienciación e sensibilización, por parte dos medios de comunicación, da necesidade de xerarquizar o eixo social na organización das redaccións e dos seus contidos, explorando así a súa articulación na axenda diaria en igualdade de importancia co tándem político-económico, ao tempo que permita redefinir a función social e a autoría profesional dos e das xornalistas.
Os Foros
Entre outras actuacións, que inclúen a creación dun fondo documental especializado, o seguemento das noticias relativas a temáticas sociais e a elaboración de diversas unidades didácticas e manuais teóricos, o Seminario Permanente apostará nos próximos anos pola organización dunha serie de Foros Internacionais sobre as cuestións centrais que aborda.Estes Foros, que terán un carácter mixto ao combinar unha fase virtual e unha fase presencial, pretenden estimular un diálogo transdisciplinar e multilateral entre profesionais da información, comunidade académica e sociedade civil organizada, colocando en común e discutindo as problemáticas que a todos incumben.
Os textos e comunicacións presentados serán disponibilizados en-liña, participando todas as persoas implicadas na súa crítica e análise, como requirimento previo para a súa posterior publicación na revista especializada que lanzará o Seminario: Comunicación e Cidadanía. Revista Internacional de Xornalismo Social - Social Journalism International Review. Os Foros culminarán nun encontro presencial no que estabelecerán as conclusións finais.